Одобрени се првите 8 проекти, со вкупна вредност од 7,7 милиони. евра по Приоритетот 3 „Интегриран развој на прекуграничниот регион“ на Програмата INTERREG VI-A ИПА Бугарија - Северна Македонија 2021-2027, што го означува почетокот на вистинската имплементација на интегрираната територијална стратегија во рамките на програмата и поконкретно развивање на атрактивен, туристички производ за сите сезони преку интелигентни решенија.
Што новото?
Овие проекти се првите конкретни чекори кон имплементација на Територијалната стратегија и се одликуваат со нивниот интегриран карактер, здружувајќи ги претставниците од различни општествени и економски сектори и стимулирајќи поблиски партнерства меѓу локалните власти, бизнисите и граѓанските организации во двете земји.
Главниот акцент на Територијалната стратегија е да создаде посилно и поангажирано локално учество, при што самите заедници даваат приоритет и ги одредуваат инвестициите кои ги задоволуваат нивните специфични потреби. Овие проекти не само што ја нагласуваат соработката, туку и се стремат да ги здружат силите за поголема одржливост, иновации и конкурентност во регионот. Тие покриваат важни области како што се подобрување на мобилноста и поврзаноста, брендирање и маркетинг на прекугранични туристички производи и зајакнување на врските помеѓу културните и природните ресурси и животната средина. Освен тоа, се планираат активности за намалување на ранливоста на туристичките услуги, што е важен чекор кон стабилноста на секторот.
Очекуваните резултати вклучуваат модернизирана инфраструктура, подобрена пристапност и проширени туристички услуги, што ќе придонесе регионот да се трансформира во туристичка дестинација во текот на целата година. Инвестициите имаат за цел да го промовираат економскиот раст преку создавање на нови работни места, стимулирање на иновациите и одржливо користење на природните и културните ресурси.
Каде ќе се инвестираат средствата?
Средствата ќе бидат насочени кон инвестиции во општините во Бугарија и Северна Македонија:
Во Бугарија: Благоевград, Разлог, Ќустендил, Невестино, Дупница, Кресна, Петрич, Струмјани, Сандански, Гоце Делчев, Белица и Јакоруда.
Во Северна Македонија: Делчево, Гевгелија, Богданци, Крива Паланка, Старо Нагоричане, Василево, Струмица, Берово, Штип, Пробиштип, Македонска Каменица и Карбинци.
Што предстои?
Во 2025 година во рамките на интегрираната територијална стратегија на Програмата INTERREG VI-A ИПА Бугарија - Северна Македонија 2021-2027 ќе биде објавен Повик за аплицирање за микро, мали и средни претпријатија. Целта е да се поддржат активностите за технолошка модернизација кои ќе го направат бизнисот поеколошки, дигитален и конкурентен. Исто така ќе се потикнува и стекнувањето на нови знаења и вештини, како и развој на нови производи и пристап до пазарите преку маркетинг, претприемништво и интернационализација.
Одобрените проекти и претстојните иницијативи имаат амбиција да го промовираат прекуграничниот регион како пример за успешна соработка и одржлив развој.