Нова атракција во Хисарлак дава поттик на активниот туризам во регионот

Нов адреналиски парк и еко-патека ги пречекуваат посетителите во паркот-шума Хисарлак во близина на Ќустендил. Атракцијата беше официјално отворена на почетокот на јуни и е дел од проект за развој на одржлив туризам во прекуграничниот регион меѓу Бугарија и Северна Македонија. 

Со буџет од речиси 1 милион евра, проектот BGMK0200028 „Прекугранична привлечност – паметен туризам во регионот Ќустендил – Крива Паланка – Невестино“, кофинансиран од програмата Interreg VI-A IPA Бугарија – Северна Македонија 2021–2027, е меѓу најзначајните инвестиции во туристичката инфраструктура во регионот. Неговата цел е да го промовира развојот на одржливиот туризам и да создаде нови можности за искуства во природата од двете страни на границата. 

Проектот го спроведуваат Општина Ќустендил, Општина Крива Паланка, Оштина Невестино, Североисточниот плански регион Куманово, Трговско-индустриска комора Ќустендил и Музејот Куманово и има за цел подобро да го искористи туристичкиот потенцијал на прекуграничниот регион. 

Новиот адреналиски парк  нуди различни рути и предизвици за посетители од различни возрасти, а еко-патеката ги надополнува можностите за прошетки и истражување на природните карактеристики на областа. Заедно, тие создаваат нов простор за активна рекреација, спорт и семејни искуства на отворено. 

Отворањето се совпадна со Меѓународниот ден на детето и привлече десетици семејства, жители и гости на Ќустендил. Демонстрациите на паркот со јажиња, креативните работилници и разните активности го претворија денот во вистински празник за најмладите посетители. 

Меѓу официјалните гости на настанот беа градоначалникот на општина Ќустендил, инж. Огњан Атанасов, градоначалникот на општина Крива Паланка, Сашко Митовски, генералниот секретар на Трговско-индустриската комора на Ќустендил, Јордан Беловодски и раководителот на Заедничкиот секретаријат на програмата, Тони Јакимовски. Во своите говори, тие ја истакнаа важноста на проектот за развој на туризмот, прекуграничната соработка и создавањето нови можности за локалните заедници од двете страни на границата. 

Новата атракција е дел од пошироките напори за воспоставување на регионот како привлечна дестинација за активен и одржлив туризам. Со инвестирање во туристичка инфраструктура и создавање нови искуства за посетителите, проектот придонесува за подобра поврзаност помеѓу Ќустендил, Крива Паланка и Невестино и го промовира развојот на заеднички туристички производ во прекуграничниот регион. 

Како продолжение на проектните активности, на 2 јуни, во Ќустендил се одржа туристички и презентациски панел „Ќустендил и регионот - нови атракции, поврзаност и одржлив туризам“, на кој учествуваа претставници од туристичкиот сектор, туроператори и засегнати страни за да разговараат за можностите за промоција на нови туристички производи и идниот развој на регионот како туристичка дестинација.